فضفضه حموات على التليفونات
الست ام احمد فى زياره لبيت ابنها احمد ورن موبايلها وكانت المتصله صاحبتها الست ام اشرف
الو أهلا ازيك يا ام اشرف
ازيك يا ام احمد فينك ؟ عاش من شافك ولا سمع صوتك
اصل انا قاعده شويه كده اليومين دول عند ابنى احمد
خير ان شاء الله !
ابدا ابنى حبيبى وحشنى قلت اجى اقعد لى عنده يومين
طيب وابو احمد وتامر وسعاد ( اخوات احمد ) ؟ مش عندهم امتحانات اليومين دول ؟ مش برضه تامر فى ثانويه عامه وسعاد تالته جامعه ؟
ايوه يا اختى يعنى انا هاعمل لهم ايه ؟ هاروح امتحن معاهم يعنى ؟ اهم معاهم ابوهم خليهم يحسوا بقيمتى شويه .
يعنى لو كان بيت احمد كبير شويه ومش بعيد كده فى اخر الدنيا كانوا جم قعدوا هنا
ولا يعنى مراته فاكره انى احمل واخلف واربى واكبر وهى تيجى تاخده !
لآ دى لازم تفهم ان ليا حق فيه
وانتى من امتى وانتى عندك ؟
يجى كده شهر ولا شهر ونص مش فاكره
ومراته عامله معاكى ايه ؟ ده انا يا اختى مرات ابنى اخر مره زرتهم طلعتنى من بيتهم على المستشفى
يا خبر ليه كفى الله الشر يا ام اشرف ؟
انتى عارفه يا ام احمد يا ختى ان عندى الضغط والسكر والمفتريه من ساعه ما دخلت عندهم وهى نازله غيظ فيا
أزاى ؟
الدكتور مانعنى من الرز والمكرونه ودى كل يوم تطبخ رز ومكرونه ولما اكلمها تقولى بسهوله لا يا ماما ده اكل الولاد بس انتى انا عامله لك سوتيه ولحمه مشويه سو !... سو! .. ايه يختى .. سوتيه معلش اتنأوزى عليا أتناوزى ما انا مش متعلمه ولا داخله جامعه زيك
تقوم البت ما تردش وتسيبنى وتدخل المطبخ
ولا لما الواد الصغير سخن وجاتله كحه جامده وانا اقول لها يا بنتى ادهنى له صدره بشويه زيت وحطيله جرنان تقوم واخده الواد ونازله آل ايه على الدكتور وترجع وفى ايدها كيس دوا أدددددددددددددددد كده
يا ختى الدوا ده كله سموم بتدخل جسم الواد الغلبان هو فيه احسن من الوصفات الطبيعيه ما احنا مربين كل ولادنا عليها واهم ماشاء الله عليهم زى الفل
وليه وليه اتنرفز عليها شويه مانتى عارفه يا ام احمد الواحده فينا لما بتكبر خلقها بيكون ضيق وما تستحملش تشوف الغلط وتسكت بصراحه
ما قدرتش بقى الواد صعب عليا وما حسيتش بنفسى غير وانا باقولها يعنى برضه ما سمعتيش الكلام وعملتى اللى فى دماغك يا بنت ال............مش ح اتكلم خالص
تقوم تبص لى ونرد بكل بجاحه اهلى اللى انتى بيشتميهم دول ربونى كويس وعلمونى الادب عشان كده انا مش هارد على اهانتك
وتسيبنى وتاخد الواد وتدخل الاوضه وتديه الدوا
وانا ما حسيتش بنفسى بعدها السكر على والضغط كان هيموتنى واخدونى على المستشفى وحسبى الله ونعم الوكيل
معلش يا حبيبتى كله سلف ودين ومسيرك يا مرات الابن هتبقى حما
وانتى بقى قاعده دلوقتى بتعملى ايه يا ام احمد ؟
ابدا يا حبيبتى ده انا قاعده لوحدى كلهم سايبنى
يا خبر سايبينك كلهم وراحوا فين ؟
ابنى فى شغله والاولاد فى المدرسه ومراته راحت السوق تشترى طلبات البيت وحياتك حتى ولو هنا ما باشوف وشها ولا بتقعد معايا يا بتطبخ يا بتغسل يا بتنظف ما تقوليش شملوله قوى ولا النظافه مقطعه بعضها
واول يا اختى ما العيال يرجعوا من المدرسه تغديهم وتنصب لهم جبل كتب وتقعد فى وسطيهم ال يعنى بتذاكر لهم لما خيبت العيال مش تسيبهم كده يعتمدوا على نفسهم والا تعلمهم الكسل من صغرهم
ولا الرطن اشى انجليزى والسخام التانى ده اللى اسمه فرنساوى هى ترطن وهما وراها هتبوظ دماغ العيال
وتيجى تتكلمى ولا تنصحى كلمتك تقف فى الزور
اه ه خلينا ساكتين
طيب بتقولى الشقه صغيره امال بتنامى فين ؟
أه... بانام فى اوضه العيال هى واخده العيال يناموا عندها ورميانى انا فى اوضتهم يلا مسيرك يا مرات ابنى هتبقى حما
وكله كوم والست اللى عامله نفسها ملتزمه وبتاعه ربنا ده كوم تانى ياختى ما تطلعش من باب الشقه غير متغطيه ومش باين منها ضفرها عشان الناس تقول يا سلام
بس تعالى شوفيها وهى قاعده فى البيت بالمحزق والملزق وحطه الاحمر والاخضر فى وشها وهى مش عارفه انها كده بتهرب الملايكه من البيت مش تلبس لها حاجه محتشمه كده حسبى الله ونعم الوكيل
طيب طيب يا ام اشرف مخضوضة
مع السلامه دلوقتى
شكلها رجعت انا سمعاها بتفتح الباب
اصلها يختى بتتهمنى وبتقول عليا انى باقول اسرار بيتها على التليفون
نكمل بعدين بقى
2013-11-20, 6:05 pm من طرف 
